#ডিজিটেল_ডেস্কঃ এটা সময় আছিল যেতিয়া কোনো অসমীয়াই ৰাষ্ট্ৰীয় প্ৰযায়ত মৰ্যাদা লাভ কৰিলে সেয়া এক অকল্পনীয় অথৱা অসম্ভৱ সত্য হিচাপে গন্য কৰা হৈছিল৷ কিন্তু সময়ৰ পৰিৱৰ্তনৰ লগে লগে এতিয়া অসমৰ মাটি, পানীত ডাঙৰ হোৱা খাটি অসমীয়াই ৰাষ্ট্ৰীয় পৰ্যায়টো বাদেই আন্তঃৰাষ্ট্ৰীয় পৰ্যায়তো অসমৰ নাম জিলিকাই তুলিবলৈ সক্ষম হৈছে৷

কিছুদিন পূৰ্বে এগৰাকী অসমীয়া কন্যা অভিস্কা বৰুৱাই বিমান সেৱাৰ প্ৰথমগৰাকী অসমীয়া মহিলা পাইলট হিচাপে স্বীকৃতি লাভ কৰাৰ পিছতে ইণ্ডোনেছিয়াৰ জাকাৰ্টাত অনুষ্ঠিত এছিয়ান গেমছত দুটা ৰূপৰ আৰু এটা স্বৰ্ণ পদক জয় কৰি ধিং এক্সপ্ৰেছ হিমা দায়ে বিশ্ববাসীৰ সন্মুখত অসমক জিলিকাই তুলিবলৈ সক্ষম হৈছে৷ ইয়াৰ পিছতে পুনৰ এক ভাল খবৰে এইবাৰ অসমীয়াক গৌৰৱাম্বিত কৰি তুলিবলৈ গৈ আছে৷

দেশৰ মুখ্য ন্যায়াধীশ হিচাপে এইবাৰ ন্যায়াধীশ ৰঞ্জন গগৈৰ নাম বাচনি কৰা হৈছে৷ অহা ৩ অক্টোবৰত তেওঁ দেশৰ শীৰ্ষ আদালতৰ মুখ্য ন্যায়াধীশ হিচাপে শপত গ্ৰহণ কৰিব৷

 উল্লেখ্য যে, ১৯৫৪ চনৰ ১৮ নৱেম্বৰত জন্মগ্ৰহণ কৰা ৰঞ্জন গগৈয়ে ২০১১ চনৰ ১২ ফেব্ৰুৱাৰীৰ পৰা ২০১২ চনৰ ২৩ এপ্ৰিললৈ পঞ্জাৱ আৰু হাৰিয়াণাৰ উচ্চ আদালত মুখ্য ন্যায়াধীশ হিচাপে কাৰ্যনিৰ্বাহ কৰিছিল৷ অসমৰ প্ৰাক্তন মুখ্যমন্ত্ৰী কেশৱ চন্দ্ৰ গগৈৰ পুত্ৰ ৬৩ বছৰীয়া ৰঞ্জন গগৈ এইবাৰ দেশৰ শীৰ্ষ আদালতত মুখ্য ন্যায়াধীশ হিচাপে নিযুক্তি লাভ কৰাত ৰাজ্যবাসী উৎফুল্লিত হৈ পৰিছে৷